一開始點解會選擇去波蘭? 其中一個原因就係想去Krakow。上年去完Munich嘅集中營 (Dachau) 後就想嚟呢個更大規模、保存得更完整嘅集中營。當然啦, 如果覺得集中營太傷感的話, Krakow都有其他嘢睇。等我續一介紹吓我去過嘅地方 (唔敢叫集中營做"景點"...實在係一個太沈重嘅地方...)。

Day 4-6 Krakow (克拉科夫)

旅程嘅第四日一早由Warsaw搭火車去Krakow。又係訂咗頭等車票 (訂車票嘅網頁請見第一部), 所以可以試埋火車餐牌上嘅第二款食物 - waffle with cream cheese and nuts。因為車程都要2hr15min, 所以啱啱好可以趕到睇埋Schindler's List嘅下半 (一套由史提芬史匹堡執導嘅電影, 改編自真人真事, 下文會講少少)。 要趕住睇埋套戲係因為個日係Krakow嘅行程就係要去Schindler's Factory~

係Krakow訂咗嘅酒店亦都係火車站附近。步程大約5-10分鐘。呢間亦都係成個旅程我最鐘意嘅酒店 (房間好舒服同埋hi-tech, 24小時各種咖啡同茶包免費任飲, 同埋位置好方便, 但因為唔幫佢賣廣告所以唔開名, 想知請PM)。因為驚係Krakow嘅時間有啲趕, 會睇唔曬所有重點, 所以選擇係度花少少錢搵個私人司機帶我去Wieliczka Salt Mine同埋Schindler's Factory 去解決呢個問題。如果自己去當然冇問題, 但係交通同排隊買入場門票要較長時間 (私人司機包點對點接送, 同埋去Schindler's Factory佢一早已買好入場門票可以唔駛排隊, 因為個度每日有限人流, 晏少少去都分分鐘入唔到場, 咁就打亂曬啲行程!)。

個司機係酒店接我之後第一站就去Wieliczka Salt Mine先。由市中心去Wieliczka Salt Mine嘅車程都要30-40分鐘。去到個度司機去幫我買入場門票, 我可以去周圍行吓。下圖白色帳篷係其中一種語言觀光團嘅等候區, 不同語言觀光團係唔同位置等㗎, 去要留意。而好彩我係參加"Tourist Route"英文團, 開團比較多, 所以只係等咗半個鐘 (因為到嘅時候啱啱好有一團出咗發)。同埋如果入去想影相記住要買許可證, 10pln。佢除咗Tourist Route之外仲有其他玩法, 可以係網頁到睇到有咩選擇, 有啲仲可以體驗吓做鹽礦工係做咩。

入到去準備室導遊會派每人一個耳機, 因為一團都幾十人, 用耳機聽佢講解會清楚好多。大家攞曬耳機之後就出發啦! 第一步就係要轉落53層嘅地底, 共380級樓梯, 去開始呢個探險之旅! 轉到頭都暈!

落到地底去咗好多個"chamber", 有啲會係講解以前係鹽壙壙工嘅辛酸, 有啲就有以前嘅雕像原封不動放係度 (下圖呢個由大理石雕成)。條條嘅隧道都仲可以見到鹽嘅蹤影, 導遊話如果想証明係唔係鹽最快捷嘅方法係用條脷...lol 

其中最宏偉應該就係Chapel of St. Kinga。冇諗過一個壙場入面可以有一個咁寬闊嘅"房", 好似一個大舞廳, 仲要有啲好靚嘅雕刻, 都係以前啲礦工雕㗎! 手工好勁!

我哋呢個團去咗礦場嘅其中三層。另一個令我印象深刻, 起得好靚嘅chamber:

下面呢個chamber唔同之處係個空間係用炸藥炸開。

導遊話原本可以坐船遊壙場, 但係宜家太多人嚟會塞車...原本船隻可以經過嘅隧道:

去完Weiliczka Salt Mine, 司機就係停車場等我, 接住就去Schindler's Factory。短短咁介紹吓上面提過Schindler's List呢套戲 - 套戲係改編自本書, 本書係講 (真人真事) 一個德國納粹商人係二次世界大戰嘅時間利用自己間廠需要工人呢個原因, 收留 (救) 咗千幾個原本好大機會 (或者已經) 被送去集中營受死嘅波蘭猶太人。雖然友人已經提醒過Schindler's Factory呢個博物館冇咩係關於套電影, 但去到都不禁有啲失望...個博物館只得一間房有提過Schindler, 同埋個博物館的確係Schindler間廠嘅遺址度起...但其他都係關於戰時嘅Krakow (係...其實Schindler's Factory作為一個景點另一個名叫Museum of Wartim Krakow, 所以佢係貼題嘅...)。走嘅時間仲要落大雨, 灰咗...

完曬啲行程就請司機車我去Krakow Old Town作為終點站。雖然落雨, 但係Old Town都好多人, 夜景都幾靚呀! 好多人亦因為避雨避咗入Cloth Hall。因為Krakow以前係一個商貿中心, 所以大批商人會係Cloth Hall傾生意, 亦都會係絲綢、香料、皮革等商品入口嘅地方。而Weiliczka Salt Mine嘅鹽亦會經個度出口㗎。當然啦, 宜家全部商店都係賣手信。

4A3A0104

個晚雖然落住雨但咁啱經過一個戶外市集, 就係個度街邊檔啲小食當晚餐啦! 係咁凍嘅天氣緊係要叫番杯熱嘅甜酒, 呵呵! 

4A3A0121

4A3A0123

 

第五日終於到重點! 以前, Auschwitz 集中營 (下稱 "Auschwitz") 只係教科書上面嘅一行行文字。宜家, 呢段歷史活活的展現係眼前。

先簡單介紹吓Auschwitz:

Auschwitz當年分咗三大區域運作。一開始只有Auschwitz I, Auschwitz II-Birkenau (下稱 "Birkenau") 同埋Auschwitz III-Monowitz (下稱 "Monowitz") 係後建嘅。而Auschwitz I起初只係為咗監禁被捕但監獄唔夠位擺嘅波蘭政治犯, 但後尾慢慢演變到專殺猶太人嘅地方。係Auschwitz I個22棟建築物都滿曬, Birkenau同Monowitz作為subcamp建成。其實Auschwitz I只係有兩個毒氣室 (gas chamber), 而Birkenau係有六個, 可想而知Birkenau係大好多, 亦都係殺多好多人。根據官方網站, 成個Auschwitz運作期間有大約一百三十萬人被送去集中營, 當中只有二十萬人幸存。

因為比較遲先訂去集中營嘅入場門票, 所以只係剩番一個六個鐘嘅"硏學"團 (網頁個名係"6 hours study tour") 俾我訂, 仲要只係得番一個位...平時人哋去參觀通常係參加2.5或3.5個鐘嘅團, 所以一直都好擔心自己報咗一個比人長一倍時間嘅團 (心理同體力上) 會唔會好攰。但好彩個領隊講解得好好, 亦有好多可以睇嘅地方, 所以到最尾根本唔覺得已經過咗六個鐘。

個團早上9.30開始, 所以搭咗早上8.05個班車。巴士站亦好近住處, 穿過火車站上一層就到。但去到個時已經好多人! 差啲無位坐...車程都要成個鐘。到達Auschwitz I要過簡單嘅安檢, 之後根據你已經訂好嘅團去唔同位等領隊。因為十月係參觀高鋒期, 所以一定要參加導賞團先入得Auschwitz I。同領隊團友匯合後就開始啦! 呢個地方真係唔係玩玩吓。有幾個年輕人係集中營入口影打卡相好嘈同玩玩吓, 立即俾我團嘅領隊鬧, 要佢哋尊重啲呢個地方...

IMG_4380

呢個硏學團頭兩個幾鐘係喺Auschwitz I, 然後有大約半個鐘嘅休息 (但係呢半個鐘內要自己去搭個架免費接駁巴士去Birkenau門口集合等第二部分開始), 後半段個兩個幾鐘就係Birkenau。Auschwitz I嘅建築物都係下圖咁嘅樣, 相比Birkenau可以話靚好多。Auschwitz I啲原址有幾個變咗做展出當年被送入集中營不幸者嘅物品, 有啲就完全保留原貌, 所有設施連地板同檣上嘅印都保留咗...近年Auschwitz I仲開多咗個係播番啲以前未有集中營時啲人嘅生活相片、影片, 造成好大嘅對比...個度仲放咗一本名冊, 係死者嘅名冊...當中有啲頁數空白咗用嚟記念啲無名犧牲者。領隊話遲啲有機會可能開埋當年用嚟做醫學實驗個橦, 到時真係更加心寒。

Auschwitz I最後一站就係當年集中營有去冇回嘅地方 - 毒氣室。係入面唔係逗留好耐, 因為地方細又團接團咁...所以領隊都無太多解釋, 留番係Birkenau啲遺址再講。

而Birkenau就係個條長長火車軌個度...Birkenau大部分都係木屋, 環境比Auschwitz I差好多。想像吓係冬天零下唔知幾多度嘅時候, 就算只係喺木屋入面唔駛你出去做嘢...個火爐又唔夠整熱成間房 (領隊話個火爐嘅溫度係啲人會瞓上去取暖...但又有幾多個位可以俾啲人咁瞓呢...)。領隊又介紹, 一格床可以瞓多達十個人...一張床會迫到三十個...咁成間屋嘅密度大家亦可想像到...

FullSizeRender 7

因為納粹軍撤走嘅時候想破壞曬有關佢哋罪行嘅一切證據, 所以所有毒氣室係1945年1月被炸毀 (Auschwitz I嗰個除外)。Birkenau由1942年3月開始運作, 同年5月亦係納粹軍第一次進行大型篩選, 將第一批受害者以毒氣室殺害。當時啲人係不知情嘅情況下被送去毒氣室。係入去前會經過一間更衣室, 以為被要求除曬衫係去沖涼, 納粹軍 (或一啲被委派去幫手嘅囚犯) 仲會叫佢哋記住自己放衫個位嘅號碼...但當然佢哋根本冇命返去攞自己啲衫。係毒氣室死咗之後屍體會被移到隔離嘅火葬場立即燒掉。呢個動作就由1942年5月開始至1944年11月不停重複, 到後期因為連火葬場都燒得唔夠快, 佢哋只好將啲屍體索性係毒氣室外嘅空地燒咗就算。所以個遺址完全可以令大家想像到成個一條龍過程係點發生。

因為Birkenau係呢個種族清洗嘅歷史入面係一個好重要嘅地方, 當時世界各地嘅猶太人被運到呢度 (全個Auschwitz死者當中有九成係喺Birkenau被殺, 當中有九成係猶太人), 所以我哋去個時仲見到好多猶太學生去渡念死者。而Birkenau以前嘅行政辦公室其中一部分就用嚟展出咗其中一啲幸存者或死者嘅故事, 個度亦係成個團嘅最後一站。

FullSizeRender 9

解散前領隊亦話我哋知原來所有好萊塢嘅電影係唔可以係Auschwitz入面拍, 要係啲鐵絲網外攞景, 因為要尊重呢個地方。而佢自己亦幫過Denial呢套電影提供資料同協助拍攝, 所以知道好多拍攝內容 (就好似主角佢哋去視察個毒氣室遺址原來係喺英國唔知邊度拍!)。完咗個團都只係大約下午3點, 所以可以慢慢係Birkenau影相。而個晚太攰, 晚餐係Burger King攪掂, 但外國嘅Burger King實在太好味, 太犯規了吧!

 

第六日留番係市區。朝早去咗個廢廢嘅皇宮 (Wawel Castle) 同大教堂 (Wawel Cathedral)。兩者規模、展品同其他歐洲城市 (如Prague) 嘅皇宮、大教堂真係冇得比。 仲要大部分都唔可以影相, 真係好彩安排咗係星期一去, 有幾個館都係免費入場。

因為個皇宮有啲悶, 都冇心機去曬所有館。所以下晝趕得切參加"Jewish Krakow"嘅free walking tour, 睇吓入集中營之前猶太人係Krakow係點生活。個團去咗好幾個以前猶太人主要聚集嘅地方 (例如廣場、市場、猶太會堂 (synagogue) 等)。領隊仲帶咗我哋去拍Schindler's List嘅廣場同埋有條電影中好令人印象深刻嘅樓梯。

啲猶太人被送去Auschwitz之前, 其實已經經歷咗一段被打壓嘅時間。佢哋係被納粹德軍下令離開Krakow, 可以留低嘅都係啲"有用"啲嘅猶太人。但係1941年, 剩餘個啲就被遷移到一個由墓碑石建成圍牆嘅貧民區 (ghetto) 生活。貧民區只有三個入口, 如果要出去做嘢嘅都要攞許可證。原來一個住3,500人嘅小區就迫咗16,000人。之後因為數字一路增加, 直至佢哋開始被送去唔同嘅集中營先開始減少。個walking tour到差唔多最尾嘅時候就經過以前貧民區剩低嘅少部分圍牆, 全市只剩番兩小塊遺址。

行完兩個鐘散團後同咗兩位分別來自德國同台灣嘅團友去食領隊介紹嘅街頭小食 (Zapiekanki), 原味 (有芝士同蘑菇) 一條都只係5pln! 德國妹妹好食得, 竟然可以自己食曬成條包 (我同台灣團友買咗一條芝士蘑菇同火腿餡嘅一人一半, 7pln)! 之後可惜大家都有自己要去嘅景點, 所以就此分道揚鑣。

係Krakow嘅第一日因為落雨冇上到St. Mary's Basilica頂睇Krakow全景, 諗住食完嘢可以去番 (而第六日嘅日落超靚!), 但竟然佢無開...只好係Main Square睇啦...

行咗成日係時候去坐吓。又根據T網搵咗間酒吧兼餐廳, 點咗個小食同杯vodka cocktail, 杯cocktail有個好靚嘅名叫Stardust。可能係點餐前我問個侍應太多有關vodka嘅問題, 佢之後竟然送咗杯俾我, 呵呵呵呵! 另外再試多咗杯原味, 都幾純, 唔會好烈嘅感覺。

FullSizeRender 5

FullSizeRender 6

咁就完咗我係Krakow好豐富嘅行程啦!

第三部會介紹我係Zakopane行山"驚險"之旅, 同埋被選為"Europe Best Destination 2018"嘅Wroclaw! 等我呀!!

~第二部完~

 

後記: 順勢推一推呢本由友人推介嘅書 (其實可能好多人已經睇過, 只係我太少睇書 =P), 係講係Aushcwitz嘅一個真嘅愛情兼求生故事。雖然未睇曬, 但一路睇一路記起去過嘅地方, 完全將成個故仔係腦入面形象化咗。

你可能有興趣:

第一部: Gdansk + Warsaw

第三部: Zakopane (上)

第四部: Zakopane (下)

第五部: Wroclaw

 

arrow
arrow

    Lemu 發表在 痞客邦 留言(0) 人氣()