好耐好耐以前已經開始想寫旅遊blog, 諗唔到會係去完波蘭之後開始寫! 連今年較早前去嘅Morocco, 第一次踏足非洲同埋係一個咁異國風情同埋特別嘅地方都冇好好寫吓...
第一篇blog可能有好多瑕疵, 請多多包容~
今次波蘭之旅應該係去咁多旅行計劃得最少嘅一次 (連去首爾都計劃得多過佢)! 買咗機票同訂咗酒店後就撻咗皮...行程大致上定咗會去呢啲城市: Gdansk & Sopot (一日) --> Warsaw (兩日) --> Krakow (三日) --> Zakopane (三日) --> Wroclaw (兩日)
Day 1 Gdansk (格但斯克) & Sopot (索波特)
去程飛redeye (但留意要係Munich轉機，因為香港冇得直飛Gdansk), 大約早上8點幾9點到達Gdansk機場。由Gdansk機場搭210號巴士出市中心方便快捷 (係機場搵個巴士站亦超易, 機場一出咗個接機位地下就開始有條線指示點樣行去巴士站, 一路跟住走就係, 好貼心噢!), 而210號巴士我估通常都係最多人等個架。巴士每位3.8pln, 上車向司機買票或係巴士站有售票機 (我係前者, 因為趕車 lol)。
落車個位正正係市中心火車站Gdansk Glowny對出。而我住嘅酒店就係正火車站同巴士站嘅對面。但因為一條大馬路之隔, 就要攞住我個重篋行隧道...但好彩, 唔駛5分鐘就到。
呢個城市嘅主要景點相對集中, 亦都係步行距離, 所以決定由酒店行去。行去聚集好多景點個邊 (Main Square & Old Town) 都係大約15-20分鐘。10月中嘅Gdansk好有秋意, 隨手影都好靚呀!
Gdansk以前係一個好重要嘅貿易港, 同埋亦有琥珀之都嘅美譽 (因為波蘭北部盛產琥珀 (amber), 而Gdansk有好多加工坊而成為集散地)。所以就有條琥珀之路 (Ulica Mariacka or Mariacka Street) 專賣琥珀, 好多首飾、擺設...同埋原來琥珀有好幾種主色, 成日都以為只係得黃色, 因為 "amber"呢個顏色!
仲有美美嘅港口! 因為知道佢日夜都靚, 所以去完Sopot夜晚特登返嚟影夜景 (呢個亦都係自己去旅行嘅好處, 如果同朋友咁chur應該好少人會理我!) - Gdansk港口的日與夜, 日間就好多人係港口旁散步或者去啲餐廳hea, 夜晚就有好多年輕人係港口飲酒吹水:
仲有Main Square個邊, 幾靚但比起其他歐洲大城市, 呢到真係無咩嘢做, 可能多啲人嚟就可以hea耐啲, 周圍影吓相...又可能只係因爲我唔太想去博物館個啲 (因為Warsaw & Krakow會有好多...)...
所以食完波蘭餃子 (Pierogi) 之後就去咗Sopot。波蘭餃子同中式水餃差唔多樣, 味就有好多選擇, 有咸有甜...味道ok㗎, 但係一個人食呢個份量, 我個晚都唔駛食晚飯...
食完餃出去見到嘅靚景, 真係行快少少都會睇唔到...
跟住就搭火車去Sopot...第一次搭有啲驚搭錯車, 因為指示唔係好清楚, 但係車票就好容易買 (部售票機好易用, 可以英文版面選擇目的地即可)。火車大約搭20分鐘, 落車後行大約10分鐘就到Sopot大街。大街有呢間可愛嘅變形屋 (但入面完全冇特別...), 好容易見到, 亦係Sopot嘅其中一個景點 (根據某T字頭旅遊網 lol)。
重點當然係個浪漫木板橋啦! 呢條係歐洲最長嘅木板橋同碼頭 (515.5m), 係上面睇日落, 晚飯後又可以散步...可惜係自已嚟, 同埋如果有時間 (同埋要係夏天, 10月夜晚已經好涼!) 係呢個度假勝地住一晚都好!
等Sopot夜景之際當然來一杯啦, 呵呵!! 係波蘭第一日就係咁充實咁完咗~
Day 2-3 Warsaw (華沙)
第二日一早起程搭火車去Warsaw。因為自己去旅行唔想每秒都要超級警覺, 所以出發前豪訂咗頭等火車票! 火車票我係用 https://www.intercity.pl/en/ 呢個網訂, 要乘車日前一個月先可以開始訂。由Gdansk搭火車去Warsaw大約3個鐘。因為係頭等, 座位闊啲, 同埋有嘢食同包兩款飲品, 車費大約270港幣 (119pln)。
去Warsaw一心諗住要hea...除左計劃去POLIN Museum of the History of Polish Jews之外就冇其他計劃, 可以話係見步行步! 由酒店 (位於Warszawa Centralna約15分鐘步行距離) 搭電車去博物館。呢個博物館真係展出咗好多好多歷史...展覽形式有互動, 有展板, 用咗好多唔同嘅有趣方式將啲資料展示出嚟...真係行到太攰, 根本睇唔曬入面啲嘢。因為去個日 (星期四) 係免費入場, 只係俾咗10pln要部audio guide就係個度留咗5個鐘!
之後太攰返咗酒店hea, 諗住係酒店附近解決埋晚餐, 點知俾我係T字旅遊網發現原來酒店對面係排名第二嘅餐廳 (當然只係由T網決定排名, 但都有2695間餐廳㗎), 雖然係比較高級嘅餐廳, 但價錢比香港真係平好多, 諗住可以一試, 點知打去訂...冇位...好彩係Warsaw留兩晚, 所以訂到之後個晚。咁個晚點算?! 又上T網搵, 竟然同一條街有排名第四個間, 立即行過去! 但係精彩嘅故事通常都冇咁順利, 門口個叔叔話冇位...當我有啲失望離開之際佢又走出嚟話有, 坐bar枱, 當然無所謂啦! 就係點完餐之後就有個韓國女仔 (又係自己一個人) 入嚟, 亦被安排坐係bar枱...我隔嚟個位! 結果啦, 當然係不停傾計、食同飲啦~ 個beef tartare好好食! 而個主食嘅份量又係好大...我哋都覺得其實兩個食一份都夠, 之後仲可叫個甜品...但無論如何, 個晚真係好開心噢!
第三日完全冇行程, 咁就參加咗個關於Warsaw Old Town歷史嘅free walking tour。一來可以一次過睇曬Old Town啲重點, 二來有故仔聽, 三來可以有機會認識新朋友。
其實個日都真係幾凍同埋天氣好陰暗...所以行完就同團友去咗walking tour個導遊話以前Chopin成日去個間咖啡店!
夜晚食飯終於去番之前個晚去唔到個間餐廳! 佢應該見我係一個人, 安置咗我係一個好似被隔離嘅位, 太有私隱吧 lol 但係個侍應都好好, 好有耐性解釋個餐牌同啲酒點配。成餐個亮點係個甜品!! 好彩有叫到呀! Yoghurt ball with bergamot (coated with milk chocolate), coconut parfait, passion fruit sobert with rum~ 完全唔"溜", 個passion fruit sobert仲可以平衡番啲甜味同埋之前個塊beef tenderioin steak with foie gras (都好好味), 諗返成餐都仲好回味噢!! [注: 本旅遊書係餐廳書櫃上攞嘅, 所以我冇㗎lol]
似乎Warsaw我都係食多過玩! 呵呵呵呵!!
想知到我係Krakow, Zakopane同埋Wroclaw嘅所見所聞?! 睇埋之後嘅第二、三部啦~ 請多多支持喔 ^^
～第一部完～
你可能有興趣:
留言列表
