Morskie Oko (海洋之眼), 又叫"Fish Lake" (因為有好多魚!), 位於Tatra National Park, 被Mieguszowiecki山峰包圍。由Zakopane出發車程大約45分鐘至一個鐘。今部介紹嘅地方就係呢度!
Day 8 Morskie Oko
第八日一早起身就去Zakopane巴士總站搵個架寫住"Morskie Oko"嘅巴士, "有幸"搭到第一班車, 7.40am開出。去Morskie Oko先要撘車去Tatra National Park入口, 再行大約兩個鐘上山去個湖。由Zakopane巴士總站一程巴士就到國家公園門口 (亦都係總站落, 所以唔駛驚唔識落車)。
其實個朝早係Zakopane市內已經落雨, 點知坐巴士途中就開始落雪, 去到國家公園門口仲越落越大! 上山前去一去廁所, 出嚟嘅時候同車個三個人已經唔見咗...唯有買完入國家公園嘅門票後自己開始行啦。好大雪呀! 後尾睇返先知原來個朝只有-6度, 好彩著咗雪靴!! 行咗一陣, 地上已經鋪咗一層薄薄嘅雪。
嚟Morskie Oko之前睇其他網站介紹話會有好多訪客, 點知我去嘅時候人影都冇個, 只係隔好耐先可能有人反方向咁走 (個啲人可能係喺國家公園內過夜, 因為有五日票賣)。每次見到有人經過都好期待, 一個眼神接觸或者一個"hi"都令我覺得安全啲同冇咁悶。回頭一望, 呢四位型男好似拍廣告咁!
雖然一早知道呢條行山徑會係石屎路, 但係一直以暗斜形式上山所以都唔係行得太快。最大問題係一路落住大雪, 路面開始鋪咗一層薄雪, 有啲跣又食唔到力, 行起都幾攰...行吓行吓條大路突然發現唔見曬地吓啲腳印! 個吓個心真係怯一怯! 跟住好彩好快見到原來佢哋行咗捷徑, 所以跟住行啦 (其實跟住石屎路行都係一樣, 只係要耐啲)。
天氣真係變幻無常, 有時會見到藍天, 有時大風雪到爭唔大眼。最攞命係段路徑唔係太多標示，根本唔知道自己仲要行幾耐先到，唯有硬著頭皮繼續走。好彩嘅係, 友人已經一早話我知跟住石屎路走就會到。但有時當前面一片白濛濛, 得自己一個係條路, 能見度又低, 啲風吹入樹林發出陣陣怪聲嘅時候...真係嚇死寶寶。
一路行, 到某個位太大雪, 地上嘅腳印慢慢消失, 嚇到我要行快啲, 好似要追著啲腳印咁! 同埋啲雪都開始有啲厚度, 所以行得更辛苦。但係過咗上面個段空曠啲嘅地方就到啦!! 係呢種天氣獨自行咗啱啱好兩個鐘!! 見到盡頭嘅畫面終於呈現係眼前。行到咁遠當然要落埋個湖邊影相啦! 雖然落湖個條已經變咗"唔係路", 但路係自己行出嚟嘅, 自已嘅路自己開!
自己去遊行要影相, 最好嘅朋友就係腳架! (可惜腳架去完行山後光榮殉職...) 影咗一陣天氣又開始變差...所以去湖邊嘅餐廳避避。一入到去竟然見到同車嚟嘅肥叔叔 (點解可以行得咁快...)! 打咗個招呼後佢已經準備走。因為太攰, 叫咗杯熱葡萄酒 (mulled wine) 就係個度坐咗差唔多成個鐘!
可惜所有繼續上山嘅路已經消失於雪中, 冇得上高啲望番落個湖度, 應該會幾仙景呢! 所以係餐廳外面影多咗陣相就起行落山。
其實係餐廳後段已經開始多少少人出現 (雖然個團全部都係坐車上山!)。落山嘅時候先開始多人係迎面上山 (有幾個仲問仲有幾耐先到)。真係應該遲少少出發...其他網頁 (兼我入住個間酒店) 稱要早出發, 可能其實係指夏天或九月最多人嘅時間可以避人潮, 我今次也避得太切底了吧! 落山慢慢行, 又行咗兩個鐘。途中見到馬車上山落山好辛苦呀...如果你會嚟Morskie Oko就盡量試吓自己行, 放過啲馬啦!
搭番同一架巴士出市區, 可以係Zakopane大街落車, 唔駛由總站行返嚟咁遠。出到去已經下午3點幾, 立刻又搵芝士食!
個晚太攰完全唔想旭, 就係酒店餐廳食餐好嘅慰勞吓自己。個羊排好好食呀!! 佢係用個塊成餐飯都仍然係熱嘅石一路慢慢燒熟 (冇火係塊石下面㗎喎), 用少少粗鹽調味, 正!! 食飽飽好滿足咁完咗呢日!
獨遊Morski Oko挑戰成功!!
～第四部完～
你可能有興趣:
留言列表
