好, 係去完成個旅程整整三個月後 (中間已經去完另一個旅行 XD) 終於發表埋最後一部!
波蘭之旅最後一站選擇係Wroclaw係因為佢個機場有較多國際航班。到出發前先知, 原來Wroclaw被 European Best Destination (一個布魯塞爾推動歐洲文化及旅遊嘅組織) 選為 2018年最佳歐洲城市。
Day 10 & 11 Wroclaw (弗羅茨瓦夫)
由Zakopane去Wroclaw最直接嘅方法就係搭巴士。如果搭巴士轉火車其實時間差唔多, 所以拎住好重行李嘅我就選擇咗一程長途巴直達Wroclaw。巴士車程6個幾鐘, 為咗唔好浪費太多日照時間係車上面, 就搭咗一班勁早嘅巴士 - 早上6點開出, 下午12.50到達。天未光就出到Zakopane個巴士總站等車。
幸好巴士上有個小小嘅廁所 (但有啲污糟), 如果唔係7個鐘嘅車程都幾辛苦。終於到達Wroclaw巴士總站!
為咗之後方便觀光, 就訂咗係舊城區附近嘅酒店, 距離巴士總站大約十幾分鐘車程 (但係個日塞車搭咗成半個鐘, 幸好係搭Uber, 價錢已定亦只需付少於港幣30元)。Wroclaw同其他歐洲城市都幾似樣, 亦同好多其他波蘭城市一樣好多地方都係戰時被炸毀之後先重建。
第十日就係舊城區行吓, 玩咗一陣"dwarf hunting"。Wroclaw嘅小矮人 (dwarf) 一開始係用嚟紀念一個波蘭反共運動, 之後市內越放越多, 宜家已經有多過300個小矮人啦! Wroclaw市內仲有得買有關於尋找小矮人嘅地圖! 好鐘意最尾個三隻!
晚餐去咗一間根據T網排名幾好嘅餐廳, 可能係一個人所以又唔駛訂或等位。頭盤要咗個Foie gras mousse, 主菜係Deer tenerloin配咗杯白酒, 甜品要咗佢唔知咩嘢攞第一名嘅Puff pastry with nut cream, hazelnut praline and passion fruit ice cream。三道菜都好好味!!
波蘭之旅最後一日。開始唔舒服...因為唔舒服同驚太趕, 朝早都係酒店附近行吓, 食最後一餐波蘭午餐。有mull wine, 飲咗個蕃茄湯同埋食咗個超大份嘅薯餅...唔知份量咁大, 完全食唔曬...浪費了...
食完午餐就去咗Wroclaw嘅其中一個free walking tour, 聽吓呢個地方嘅歷史。當中去咗以前嘅一條市集街 (宜家已經變咗做賣精品嘅店舖), 一個現代嘅市集同埋Ostrow Tumski (Cathedral Island) 等等嘅地方。Ostrow Tumski係Wroclaw最舊嘅地區,面積雖然唔大,但 (如其名) 有好多間教堂都係位於呢個島。
係個free walking tour同一個波蘭女仔吹水, 原來佢係亞洲做過幾年潛水嘅工作, 但係因為波蘭太少沿海地方所以搵嘢做有啲困難。但係最終俾佢搵到係Wroclaw有份關於潛水嘅工就搬咗嚟啦! 佢想係開工前認識吓呢個城市所以就參加咗呢個團。係臨離開呢個國家都可以同人傾吓計真係好...有時可能你對一個人認識唔深, 知道只係擦肩而過, 可能更無顧忌咁分享。
由Catherdral Island行番酒店大約半個鐘。由酒店Uber出機場大約20分鐘, 港幣50元。回程機下午7點起飛, 經Frankfurt轉機, 第日嘅下午就番到香港啦! 咁就完成咗一人深度遊波蘭之旅~~
多謝各位支持我寫同埋花時間讀呢個部落格噢!
~完~
你可能有興趣:
留言列表