獨闖波蘭11日 (2018年10月) 之第三部: Zakopane (上) @ Lemu旅遊日記

經第二部的檢討後, 決定要將剩低嘅行程分三部嚟寫, 唔會再好似第二部咁長! 所以呢個第三部會講吓係Zakopane嘅上半, 所以有關係Zakopane行山只可以係第四部先見大家。Zakopane同之前去嘅城市唔同好多, 多大自然嘅景點, 我亦選擇係度跳過曬所有歷史、博物館, 俾個腦輕鬆吓。

Day 7 & 9 Zakopane (扎科帕內) & Kasprowy Wierch

第七日一早就離開Krakow。今次唔再係搭火車而係搭長途巴去Zakopane。去Zakopane都幾多車, 所以大約早上九點幾 (酒店話呢段時間應該唔會塞車) 去到巴士站到問邊個月台最快有車就搭咗個班, 可以上車先買車票, 20pln。車程如果順利大約兩個鐘就可以到達, 但係個日係咁整路攪到遲咗半個鐘。好彩呢日無太多行程所以無咩所謂。

由Zakopane巴士總站行去位於Zakopane大街旁嘅酒店大約15分鐘, 但係拖住個篋都有啲吃力, 要大約20-25分鐘...但間酒店實在太好, 所以如果再去我都會住番個度, 真係旺中帶靜。

去到酒店有得提早入住, 所以可以上一上房整頓先再出動。由酒店出大街只須一兩分鐘! Zakopane啲屋好靚呀, 大部分都係由本造 (酒店都係)。同埋條大街雖然大部分都係做遊客生意, 但係都好有氣氛, 落雪或有聖誕裝飾嘅時候應該更靚!

Zakopane第一站就係想去街尾搭Gubalowka Gondola上山頂睇Zakopane全景。由大街一路向下行, 落一條短隧道上番去, 再跟住個列鋪頭行就到Gondola個站。但係未到個站就被個啲唔似芝士嘅芝士吸引咗過去。成條街有一半都係賣芝士同果醬 (試過後最鐘意cranberry個隻!), 有賣凍凍嘅 (其實只係室溫, 但係十月尾個時已經只係得幾度), 有燒熱食嘅, 亦可以加果醬。第一次食就試基本個款, 之後食好幾次都係鐘意燒熱加果醬 (大約2.5-3pln)!!

滿足咗個胃就向前進發! 我嘅"好運"續摩洛哥之旅有幾個重要景點係我哋去嘅時候維修後, 今次到Gondola...(只可深深嘆一口氣)...又係維修!!! 一年維修個幾日都可以俾我中到!

唯有去旁邊走走, 睇吓有冇其他方法上山。原本想試行路軌旁邊山波上去, 點知有個人坐係度話係私家路, 每行一公里收費3pln...唯有去的士黨, 同其他遊客搭的士上去, 來回每人22pln (的士黨大賺!), 同Gondola同價。

上到山頂行咗一陣就走, 差唔多所有鋪都冇開, 又超大風...但係有隻好可愛肥肥嘅狗狗!

個晚為咗準備第二朝要早出去行山, 所以簡單咁去初嘗波蘭老麥。第八日嘅行山請留意第四部, 宜家俾住一張相先啦!

第九日仍然係Zakopane, 由巴士總站搭寫住Kunice嘅巴士 (其實似香港個啲私人24人小巴多啲) 就可去到Kasprowy Wierch個纜車站 (巴士單程3pln)。聽同車個女仔講話山上都幾靚, 但係因為個朝係咁落雨, 雖然已經到纜車站, 佢話都係之後個日再去。但係因為已經係我最後一日係Zakopane, 唯有搏一搏啦 (雖然纜車都幾貴, 要63pln)。

上Kasprowy Wierch要係中間轉一次纜車。係個度其實已經開始漂雪。一上度Kasprowy Wierch心知不妙, 能見度簡直底到一個點...30米都唔知有冇...但係有雪都好, 因為真係好鐘意落雪!!

反正都上到嚟, 又見有其他人行到上去天文台, 所以又試試跟住啲就嚟唔見咗嘅梯級走上去。途中同落嚟嘅人互相扶吓, 感覺好似大家遇到問題互相幫助咁 (諗太多 lol)。終於上到天文台, 但真係太大太大雪所以已經再行唔到去平時啲人打卡個位。影一陣相又剩番我一個, 太大雪有啲驚同危險, 所以都係快啲瀡番落去。